Fréttir
Skattalagabreytingar
Morgunverðarfundur PwC
Miðvikudaginn 2. febrúar kl. 8.30-10.00 verður haldinn morgunverðarfundur hjá PwC í Skógarhlíð 12, Reykjavík. Nánari upplýsingar um dagskrá og skráningu má nálgast hér.
*********************************************************************************************
Skattalagabreytingar
Morgunverðarfundur PwC í samstarfi við Háskólann á Akureyri
Föstudaginn 21. janúar kl. 8.30-10.15 verður haldinn morgunverðarfundur í menningarhúsinu Hofi á Akureyri. Nánari upplýsingar um dagskrá og skráningu má nálgast hér.
*********************************************************************************************
Fyrirtækin á beinu brautina
- samkomulag um úrvinnslu skuldamála lítilla og meðalstórra fyrirtækja
17. desember 2010
Víðtækt samkomulag hefur náðst um leiðir við úrvinnslu skuldamála lítilla og meðalstórra fyrirtækja. Að samkomulaginu standa efnahags- og viðskiptaráðuneytið, Félag atvinnurekenda, fjarmálaráðuneytið, Samtök atvinnulífsins, Samtök fjármálafyrirtækja og Viðskiptaráð Íslands. Samkomulagið byggir á sameiginlegum reglum fjármálafyrirtækja um fjárhaglega endurskipulagningu fyrirtækja. Sjá hér.
*********************************************************************************************
Máli slitastjórnar Glitnis gegn PwC vísað frá dómsstóli í New York
15. desember 2010
Máli slitastjórnar Glitnis banka, meðal annars gegn PwC á Íslandi, hefur verið vísað frá dómi af dómstóli í New York. Það segir í úrskurðinum að New York hafi ekki verið rétti vettvangurinn fyrir þetta mál þar sem bæði stefnandi og þeir stefndu seu íslensk.
Þessi úrskurður kemur okkur ekki á óvart, enda höfum við haldið því fram frá upphafi að þetta mál ætti ekki heima fyrir Bandarískum dómstóli.
**********************************************************
Yfirlýsing frá PwC á Íslandi
13. desember 2010
Vinnugögnum Sérstaks saksóknara og ályktunum um meinta sakarannsókn á hendur PricewaterhouseCoopers ehf (PwC) vegna endurskoðunar félagsins á ársreikningum Landsbankans og Glitnis fyrir árið 2007, hefur verið haslaður völlur í fjölmiðlum. Í ljósi þess telur fyrirtækið óhjákvæmilegt að svara fyrir sig á sama vettvangi og veita fjölmiðlum upplýsingar um endurskoðun sína á Landsbankanum og Glitni eins og framast er unnt samkvæmt lögum.
Í samræmi við þessa stefnu mun PwC birta samantekt um skýrslur fyrirtækjanna Cofisys og Lynx Advokatfirma þegar búið er að fara í gegn um skýrslurnar en PwC hefur enn ekki fengið aðgang að fylgigögnum þeirra. Ljóst er að skýrslurnar eru ófullgerð vinnugögn enda margtaka skýrsluhöfundar fram að ályktanir þeirra séu dregnar með verulegum fyrirvörum og þurfi að sannreyna frekar. Sérstaklega er varað við því að niðurstöður þeirra séu lagðar til grundvallar frekari rannsókn án þess að fram fari nánari athugun á forsendum. Ekki hefur í öllum tilvikum verið hirt um að halda fyrirvörum Cofisys og Lynx Advokatfirma til haga í umfjöllun fjölmiðla, enda þótt þau séu lykilatriði í málinu og geti breytt því í grundvallaratriðum þegar skýringa hefur verið leitað hjá stjórnendum viðkomandi banka eða endurskoðendum þeirra.
Viðurkennt er að skýrsluhöfundar höfðu takmarkað aðgengi að gögnum og skoðuðu meðal annars ekki frumgögn úr bönkunum sjálfum. Fram kemur að þeim hafi ekki verið heimilað að hafa samband við stjórnendur bankanna eða endurskoðendur. Þá er ekki tekið tillit til þess að í vinnuskjölum PwC liggja m.a. fyrir skriflegar staðfestingar frá stjórnendum og stjórnarmönnum bankanna um ýmis atriði er snerta mat á stöðu þeirra, enda hefur ekkert verið rætt við starfsfólk PwC af hálfu rannsóknaraðila.
PwC minnir á að það eru stjórnendur bankanna, þ.m.t. stjórnir og bankaráð, sem bera ábyrgð á uppgjörum þeirra. Sú ábyrgð er bæði lagaleg og samfélagsleg. Stjórnendur leggja ársreikninga fram og gefa út viðamiklar skriflegar staðfestingar til enduskoðenda um réttmæti upplýsinga. Slíkar yfirlýsingar, ásamt öðrum endurskoðunargögnum, liggja fyrir í vinnuskjölum PwC og verða lagðar fram á réttum vettvangi.
PwC telur sjálfsagt og eðlilegt að uppgjör bankanna, sem féllu haustið 2008, og endurskoðun á þeim komi til skoðunar eins og önnur atriði er tengjast bankahruninu. Jafn sjálfsagt er að öll málsmeðferð í því sambandi sé vönduð og hafin yfir vafa.
Nánari upplýsingar veitir:
Reynir Vignir, framkvæmdastjóri TSP (Territory Senior Partner), PwC í síma 550 5300
**************************************************
Fréttatilkynning frá PwC
9. desember 2010
PricewaterhouseCoopers (PwC) gerir alvarlega athugasemd við þau vinnubrögð að rannsóknarskýrslum opinbers aðila um Glitni banka og Landsbankann, er m.a. varða starfsheiður PwC, sé komið í hendur fjölmiðla til umfjöllunar án þess að PwC hafi verið kynnt efni skýrslnanna. PwC er því ómögulegt að svara þeim alvarlegu ásökunum sem látið er í veðri vaka að komi þar fram.
Af hálfu embættis sérstaks saksóknara og rannsóknaraðila á hans vegum hefur ekki verið haft samband við PwC vegna rannsóknar fyrirliggjandi gagna. PwC hefur í dag farið þess á leit við sérstakan saksóknara að fá einnig aðgang að rannsóknarskýrslunum.
Efnislegum athugasemdum verður svarað á réttum vettvangi en PwC áréttar að endurskoðunarvinna félagsins var í fullu samræmi við starfsskyldur endurskoðenda.
Nánari upplýsingar veitir:
Reynir Vignir, framkvæmdastjóri TSP (Territory Senior Partner), PwC í síma 550 5300
******************************************************************
Vegna umfjöllunar um endurskoðun Landsbankans
2. desember 2010
Vegna villandi umfjöllunar um endurskoðun Landsbanka Íslands árið 2007 og könnun árshlutareikninga 2008 vill PwC taka eftirfarandi fram:
Uppgjör Landsbankans hvort sem er ársreikningur eða árshlutareikningur, eru alfarið á ábyrgð bankaráðs og stjórnenda bankans. Sú ábyrgð er lögum samkvæmt. Ársreikninga íslenskra fyrirtækja, sem skráð eru í Kauphöll, skal skv. lögum gera í samræmi við alþjóðlega reikningsskilastaðla.
Hlutverk PwC sem endurskoðenda bankans var hins vegar að láta í té álit á ársreikningum og ályktanir um árshlutauppgjör sem bankaráð og stjórnendur lögðu fram og báru ábyrgð á. Við endurskoðunina skal samkvæmt íslenskum lögum farið eftir alþjóðlegum endurskoðunarstöðlum. Endurskoðandi ber ábyrgð á því áliti sem hann gefur í áritun sinni.
Vinna okkar var í samræmi við ýtrustu kröfur laga og reglna. Aflað var þeirra gagna sem við töldum nauðsynleg, bæði innan bankans og utan, vegna vinnu okkar. Meðal þeirra gagna eru staðfestingar stjórnenda bankans og upplýsingagjöf frá lántakendum hjá bankanum. Í bréfi skilanefndar og slitastjórnar til PwC eru hins vegar að koma fram vísbendingar og ályktanir þess efnis að framangreindar upplýsingar hafi verið rangar.
Við ítrekum að endurskoðun okkar, þar með talin rannsóknarskylda lögum samkvæmt, var í fullu samræmi við starfsskyldur endurskoðenda. Fullyrðingar, sem hafðar eru eftir lektor við Háskóla Íslands í dag, og lúta að vinnubrögðum PwC eru rangar.
Nánari upplýsingar veitir:
Reynir Vignir, framkvæmdastjóri TSP (Territory Senior Partner), PwC í síma 550 5300
******************************************************
Ályktunum slitastjórnar og skilanefndar Landsbankans vísað á bug
1. desember 2010
PricewaterhouseCoopers (PwC) hefur borist bréf frá slitastjórn og skilanefndLandsbankans þar sem settar eru fram ályktanir um skaðabótaskylda háttsemi vegna endurskoðunar á ársreikningi Landsbankans 2007 og könnunar á árshlutareikningum bankans á árinu 2008. Engar fjárkröfur eru gerðar á hendur PwC í bréfinu.
PwC hafnar alfarið þeim ályktunum sem fram koma í bréfinu og þeim staðhæfingum sem hafðar hafa verið eftir fulltrúum slitastjórnar í fjölmiðlum í dag þess efnis að PwC hafi brugðist starfsskyldum sínum í vinnu sinni fyrir Landsbankann.
Hlutverk PwC sem endurskoðenda bankans var að láta í té álit á ársreikningum ogályktanir um árshlutauppgjör. Í því fólst umsögn um það hvort reikningsskilin, sem unnin voru og lögð fram á ábyrgð stjórnenda bankans, hafi verið í samræmi við lög ogalþjóðlegar reikningsskilareglur. Niðurstöður PwC tóku mið af þeim upplýsingum sem endurskoðendur PwC höfðu aðgang að á þeim tíma þegar vinna þeirra fór fram. Endurskoðendur PwC komu ekki að gerð uppgjöra eða ákvarðanatöku í Landsbankanum.
Nánari upplýsingar veitir:
Reynir Vignir, framkvæmdastjóri TSP (Territory Senior Partner), PwC í síma 550 5300
*****************************************************
PricewaterhouseCoopers í nýjum búningi
20. september 2010
PwC kemur nú fram undir nýju vörumerki. Nafnið er einfaldað á sama tíma og aukinn þungi er lagður á gagnkvæm tengsl og verðmætasköpun viðskiptavina á ögrandi tímum.
PricewaterhouseCoopers, eitt þekktasta vörumerki heims á sviði endurskoðunar, skatta- og fyrirtækjaráðgjafar, hefur endurnýjað vörumerki sitt og sett í frískandi búning gagnvart starfsfólki og viðskipavinum um allan heim.
Vörumerkið felur í sér upphafsstafina í nafni fyrirtækisins - „PwC“ - sem raunar hafa verið notaðir sem stytting af „PricewaterhouseCoopers“ síðan fyrirtækið var mótað í samruna árið 1998. Þessi formlega breyting eykur samræmi og auðveldar notkun nafnsins, en merkið var þróað í samráði við viðskiptavini, samstarfsaðila og starfsfólk með það fyrir augum að auðvelda notkun þess og framsetningu. PricewaterhouseCoopers verður þó áfram lögformlegt nafn fyrirtækisins, bæði hér á landi og erlendis.
Undanfarinn áratug hefur PwC vaxið og þróast. Einföldun vörumerkisins auðveldar markaðnum að meta hver við erum, hvað við gerum og hvernig við störfum. „Nýja vörumerkið aðgreinir PwC frá samkeppnisaðilunum á sjónrænan hátt, líkt og segja má um gæði þjónustunnar og framúrskarandi vinnubrögð starfsfólksins“ segir Dennis Nally, stjórnarformaður PwC International í yfirlýsingu.
Breytingin er afrakstur mikillar vinnu stjórnendateymis PwC sem naut aðstoðar alþjóðlegu vörumerkjaráðgjafastofunnar Wolff Olins við þróunina. Alþjóðleg heimasíða PwC, www.pwc.com, endurspeglar þessar breytingar nú þegar, og sama er að segja um síðu íslenska fyrirtækisins, www.pwc.com/is. Þetta eru fyrstu merkin um breytingar sem innleiddar verða á næstu misserum.
Nánari upplýsingar veitir: Ragnar Þorgeirsson, framkvæmdastjóri rekstrar í síma 550 5300
***************
Í maí 2010 var lögð fram stefna fyrir dómstóli í New York af slitastjórn, skilanefnd og fulltrúa Glitnis banka hf. erlendis gagnvart nokkrum aðilum, þ.á.m. PricewaterhouseCoopers hf.
Við teljum stefnuna gegn PricewaterhouseCoopers hf. ekki á rökum reista og tilefnislausa.
Félagið mun halda uppi vörnum af fullum krafti og væntum við þess að dómstólinn í New York vísi málinu frá. Í því sambandi getum við staðfest að fimmtudaginn 22. júlí 2010, lögðu lögmenn félagsins í New York fram kröfu um frávísun stefnunnar.
Málið er nú í höndum dómstólsins og mun félagið ekki tjá sig opinberlega um einstök atriði þess.
Frávísunarkröfuna í heild eins og hún var lögð fram af lögmönnum PwC í New York 22. júlí s.l. má nálgast hér
Nánari upplýsingar veitir: Reynir Vignir, framkvæmdastjóri – TSP í síma 550 5300
Í tilefni af stefnu Slitastjórnar og Skilanefndar Glitnis banka hf. á hendur tilteknum aðilum, og umfjöllun um PricewaterhouseCoopers hf. í því samhengi, viljum við árétta að áritanir sem vitnað er til byggðust á framlögðum gögnum og þeim upplýsingum sem PricewaterhouseCoopers hf. hafði aðgang að á þeim tíma.
PricewaterhouseCoopers hf. stendur við áritun sína á reikningsskil Glitnis banka hf. og aðrar staðfestingar sem unnar voru vegna bankans.
Nánari upplýsingar veitir: Ragnar Þorgeirsson, framkvæmdastjóri rekstrar í síma 550 5300
PricewaterhouseCoopers (PwC) fagnar útkomu skýrslu Rannsóknarnefndar Alþingis sem virðist ítarleg og vel unnin en ýmislegt í henni kemur á óvart. Eðlilega eru störf endurskoðenda til skoðunar í skýrslu sem þessari og rökrétt að þau verði áfram til athugunar vegna þeirra ábendinga og álitamála sem fram koma þar. Starfsmenn PwC áttu ágæt samskipti við nefndarmenn og starfsmenn nefndarinnar. Nefndin telur meðal annars tilefni til að afmarkaðir þættir í störfum endurskoðenda verði skoðaðir frekar, en í því sambandi er þó vert að taka fram að nefndin gerði ekki sérstaka úttekt á störfum endurskoðenda.
PwC ber ábyrgð í samræmi við það álit sem fram kemur í áritun á ársreikninga þeirra tveggja banka sem félagið endurskoðaði. Í álitinu felst að reikningsskilin, sem unnin eru í bönkunum og stjórnendur leggja fram, séu í samræmi við lög og alþjóðlegar reikningsskilareglur. Álitið tók mið af þeim upplýsingum sem endurskoðendur PwC höfðu aðgang að á þeim tíma sem það var veitt.
Endurskoðun á ársreikningum bankanna vegna ársins 2007 lauk í lok janúar 2008 og hún var unnin í samræmi við alþjóðlega endurskoðunarstaðla. Á þeim tíma sem endurskoðuninni lauk var ekki unnt að sjá fyrir þær breytingar sem urðu á virði eigna í október 2008 í kjölfar falls bankanna. Könnun árshlutareikninga bankanna fyrir fyrsta og annan ársfjórðung 2008, sem einnig var unnin í samræmi við alþjóðlega staðla, var miklu umfangsminni en endurskoðun. Könnunaráritun er verulega frábrugðin endurskoðunaráritun og gagnaöflun er takmörkuð.
Vert er að árétta að endurskoðendur semja ekki reikningsskil bankanna og eiga engan þátt í ákvörðunartöku stjórnenda.
PwC er stolt af því að vera einn af stuðningsaðilum alþjóðlegrar frumkvöðlaráðstefnu MIT, HR og Innovit sem haldin er í Reykjavík dagana 24-26 mars.
Meginþema hennar er hvernig yfirvinna megi efnahagskreppu með nýsköpun, frumkvöðlastarfi og endurnýjanlegri orku. Rúmlega fjögur hundruð manns sitja ráðstefnuna, en MIT hefur haldið slíkar ráðstefnur víða um heim undanfarin tólf ár og hafa aldrei fleiri tekið þátt.
Markmiðið með ráðstefnunni er að stuðla að nýsköpun og gefa frumkvöðlum, fræðimönnum, nemendum og fjárfestum vettvang til að skiptast á skoðunum og skapa tengsl. Allar frekari upplýsingar um ráðstefnuna má nálgast hér.
PricewaterhouseCoopers hf. hefur fest kaup á starfsemi ráðgjafarfyrirtækisins ParX. Stór hluti starfsmanna ParX starfar nú hjá Fyrirtækjaráðgjöf PwC, sem er fyrirtækinu mikill styrkur. Hjá Fyrirtækjaráðgjöf PwC starfa nú um 20 sérfræðingar með margskonar reynslu og menntun til að sinna fjölbreyttri þjónustu á sviði rannsókna, fyrirtækja- og stjórnunarráðgjafar. Hlutverk Fyrirtækjaráðgjafar er að veita stjórnendum ráðgjöf við úrlausn sinna viðfangsefna með nánu samstarfi á sviði viðskipta og rekstrar.
Frekari upplýsingar veitir Halldór Þorkelsson, sviðstjóri Fyrirtækjaráðgjafar PwC í síma 550 5229.
Í tilefni af því að PricewaterhouseCoopers hf. hélt upp á 85 ára afmæli sitt á árinu, veitti fyrirtækið Rauða kross Íslands styrk upp á samtals 850.000 krónur, 10 þúsund krónur fyrir hvert ár sem PricewaterhouseCoopers hefur starfað. Tilviljun réð því að styrkurinn var afhentur á afmælisdegi Rauða kross Íslands sem einnig fagnaði 85 ára starfsemi félagsins.
Styrkurinn var veittur í því skyni að renna stoðum undir þá aðstoð sem Rauði kross Íslands veitir bágstöddum hérlendis í því árferði sem nú ríkir á Íslandi.
Það var Vignir Rafn Gíslason, stjórnarformaður PricewaterhouseCoopers hf. sem afhendi Kristjáni Sturlusyni, framkvæmdastjóra Rauða kross Íslands, styrkinn við hátíðlega athöfn í húsnæði fyrirtækisins.
PwC var virkur þátttakandi á leiðtogafundi Asíu- og Kyrrahafsríkja, APEC, sem haldinn var í Singapore daga 12-14 nóvember. Þar komu saman yfir 800 leiðtogar úr heimi viðskipta og stjórnmála, en yfirskrift fundarins var "Rebuilding the Global Economy - crisis and opportunities".
Framkvæmdarstjóri PwC International, Dennis M. Nally, flutti erindi á fundinum.
Í tengslum við fundinn vann PwC að því að framkvæma könnun þar sem möguleg áhrif fjármálakreppunnar í heiminum og aðkoma APEC að endurreisn hagkerfisins var skoðuð.
Könnunina og niðurstöður hennar má finnar hér.
Á fimmtudagsmorguninn 1. október kl. 10.00 komu starfsmenn frá Embætti sérstaks saksóknara í húsakynni PricewaterhouseCoopers hf. í Skógarhlíð 12, til að leggja hald á gögn sem tengjast endurskoðun á reikningsskilum Landsbanka Íslands hf. og Glitnis banka hf. og dótturfélögum þeirra.
Af hálfu PricewaterhouseCoopers er lögð áhersla á að vinna sem best með embættinu og eru starfsmönnum þess afhent öll umbeðin gögn.
Fyrir liggur að heimsóknin tengist rannsókn embættisins á falli bankanna. Tekið skal fram að gagnaöflunin beinist ekki að PricewaterhouseCoopers, einstökum starfsmönnum félagsins né öðrum viðskiptavinum þess.
Nánari upplýsingar veitir: Reynir Vignir, framkvæmdastjóri – TSP í síma 5505300
PricewaterhouseCoopers tók þátt í Fjármálaráðstefnu sveitarfélaganna, sem haldin var á Hilton Hótel Nordica daga 1.-2. október. Ráðstefnan heppnaðist í alla staði vel og alls tóku um 360 sveitarstjórnarmenn og starfsmenn sveitarfélaga þátt. Nánari upplýsingar um dagskrá og erindi sem flutt voru á ráðstefnunni má finna á vef Sambands íslenskra sveitarfélaga hér
Miðvikudaginn 27. maí stóðu PricewaterhouseCoopers, Háskóli Íslands, Viðskiptablaðið, AP Almannatengsl og Norsk Styreinfo fyrir kjöri á stjórnarformanni ársins 2009. Markmiðið var að veita þeim stjórnarformanni viðurkenningu, sem náð hafði góðum árangri og stýrt starfi stjórnar af heilindum, með gott viðskiptasiðferði og samfélagsábyrgð að leiðarljósi. Allar nánari upplýsingar um kjör stjórnarformanns ársins má nálgast hér
PricewaterhouseCoopers, SAS Institue og Háskólinn í Reykjavík efndu til málþings föstudaginn 27. mars, í Háskólanum í Reykjavík. Kynntar voru glænýjar niðurstöður rannsóknar á stjórnunarreikningsskilum á Íslandi, en þetta er í fyrsta sinn sem slík rannsókn hefur verið gerð á Íslandi og því mikill fengur fyrir endurskoðendur, stjórnendur fyrirtækja og aðra áhugasama. Fundarstjóri var Guðfinna S. Bjarnadóttir og var aðgangur ókeypis og öllum opinn. Nánari upplýsingar má nálgast á vef Háskólans í Reykjavík hér
PricewaterhouseCoopers, í samstarfi við Lagadeild Háskólans í Reykjavík, stendur fyrir hádegisfundi þriðjudaginn 10. mars n.k. frá kl. 12:00-13:15 í stofu 231a í Háskólanum í Reykjavík, Ofanleiti 2. Fyrirlesari er Eva Joly, en frá árinu 1994 gegndi Eva starfi yfirrannsóknardómara, Judge d’Instruction, í Frakklandi og var lykilmaður í að rekja eitt stærsta spillingarmál sem upp hefur komið þar í landi, þar sem olíufélagið Elf Aquitaine var grunað um misferli. Ragna Árnadóttir dóms- og kirkjumálaráðherra mun flytja ávarp og fundarstjóri verður Elín Árnadóttir sviðsstjóri Skatta- og lögfræðisviðs PwC. Aðgangur er ókeypis og öllum opinn, fundurinn fer fram á ensku.
Fjármáladagur PricewaterhouseCoopers var haldinn föstudaginn 23. janúar s.l. Þangað var nemendum í meistaranámi í fjármálum og tengdum greinum boðið og kynnt starfssemi Fyrirtækjaráðgjafar PwC. Skyggnst var inn í heim fjármálanna, rætt um verðmöt, áreiðanleikakannanir, IFRS staðla og beitingu þeirra, líkanagerð og fleiri atriði sem snúa að þeirri starfsemi sem fer fram innan Fyrirtækjaráðgjafar PwC.
Fjármálaráðstefna sveitarfélaganna var haldin 13-14 nóvember s.l. á Hilton Hotel Nordica. PricewaterhouseCoopers var þátttakandi í ráðstefnunni, en þangað voru mættir aðilar frá öllum sveitarfélögum landsins. Dagskráin bar keim af breyttum aðstæðum sveitarfélaganna í skugga kreppu og til hvaða aðgerða hægt væri að grípa. Nánari upplýsingar um dagskrá ráðstefnunnar má nálgast á vef Sambands íslenskra sveitarfélaga hér
1. júlí 2008: Til þess að fagna þeim tímamótum að í dag eru 10 ár síðan Pricewaterhouse og Coopers & Lybrand sameinuðust og til varð PricewaterhouseCoopers hefur PwC hafið samstarf með Sameinuðu þjóðunum við að byggja skóla, þjálfa kennara og veita námsgögn til yfir 20.000 barna í flóttamannabúðum í Darfúr héraðinu í Súdan. Þetta frumkvæði byggir á framlögum PwC fyrirtækjanna og starfsfólki þeirra, en 10 daga átak var innan PwC sem hvatti stjórnendur og starfsfólk til að leggja sitt af mörkum til að styrkja þetta frumkvæði. Átakið hefur þegar skilað mörg hundruð þúsund dollurum í söfnunina og lagði stjórn PwC á Íslandi og starfsfólk sitt af mörkum með háum fjárframlögum. Teljum við þetta góða leið til þess að fagna þessum mikilvægu tímamótum og velgengni PricewaterhouseCoopers um allan heim.
Fimmtudaginn 5. júní býður Fjárfestingarstofan til morgunverðarfundar þar sem kynntar verða niðurstöður samkeppnisgreiningar á Íslandi fyrir ákveðin form fjármálafyrirtækja. PricewaterhouseCoopers er virkur þátttakandi í ráðstefnunni. Aðal fyrirlesari er Laurens Narraina, skattasérfræðingur hjá PwC í Belgíu og Elín Árnadóttir, sviðsstjóri Skatta- og lögfræðisviðs PwC í Reykjavík tekur þátt í pallborðsumræðum. Fundurinn er haldinn á Grand Hótel kl. 08:15 - 10:00. Hér má nálgast glærur Laurens Narraina. Sækja PDF skrá (416 kb)
Föstudaginn 16. maí halda PricewaterhouseCoopers og Háskólinn á Bifröst ráðstefnu um hvað felist í góðum stjórnarháttum innan opinberra stofnanna og fyrirtækja undir yfirskriftinni 'Stjórnarhættir hins opinbera og einkageirinn - má læra hvort af öðru?'. Sérfræðingar í stjórnarháttum og þekkt fólk úr atvinnulífinu heldur fyrirlestra og gefst fólki tækifæri á að koma með spurningar úr sal. Ráðstefnan verður haldin á Grand hótel og stendur yfir frá 14:00 - 16:00 og móttaka fyrir ráðstefnugesti á eftir. Nánari dagskrárliði er að finna hér.
PricewaterhouseCoopers er leiðandi alþjóðlegt þekkingar- og ráðgjafafyrirtæki og eru leiðtogar PwC reglulega beðnir um að deila viðhorfum sínum með viðskiptaheiminum. Samuel A. DiPiazza, framkvæmdastjóri PwC Global, talaði við Financial Times þann 11. apríl 2008 um þróun hagkerfisins og hvað við getum lært af síðustu árum.
Andrew Khan, ráðgjafi hjá PricewaterhosueCoopers, hélt fyrirlestur þann 18. mars hjá Félagi löggiltra endurskoðenda, um tölvuendurskoðun. Þar fjallaði Andrew fyrst og fremst um hvað tölvuendurskoðun er, af hverju fyrirtæki þurfa að huga að endurskoðun tölvukerfa fyrirtækja, hvaða hættur ber helst að varast og hvernig slík endurskoðun fer fram. Fyrirlesturinn fór fram á ensku og hægt er að nálgast glærurnar hér. Sækja PDF skrá (111 kb)
PricewaterhouseCoopers og Oracle stóðu fyrir ráðstefnu "Öryggi í viðskiptakerfum" þann 13. mars sem haldin var í Húsnæði PwC í Skógarhlíð 12. Meðal þess sem fjallað var um er kennistuldur og mögulega glötuð viðskiptatækifæri.
Dagskrá, skráning og aðrar upplýsingar um ráðstefnuna er að finna hér
PricewaterhouseCoopers tók þátt í Framadögum sem haldnir voru föstudaginn 1. febrúar í Háskólabíó. Framadagar heppnuðust vel og nemendur tóku vel á móti okkur.
Á hverju ári styrkir PricewaterhouseCoopers góðgerðarmál í stað þess að senda viðskiptavinum okkar jólakort. Desember 2007 ákváðum við að styrkja forvarnarsvið Samhjálpar, Marítu á Íslandi.
Hér er hægt að lesa nánar um styrk PwC til Marítu
Þann 11. desember 2007 stóðu PricewaterhouseCoopers og Viðskiptaráð Íslands fyrir sameiginlegum morgunverðarfundi um Milliverðlagningu. Á fundinum fjölluðu Aðalsteinn Hákonarson, deildarstjóri skattasviðs Ríkisskattstjóra, Kristján G. Valdimarsson, forstöðumaður skattaráðgjafar Landsbankans og Ian Dykes, meðeigandi hjá PwC í Bretlandi um milliverðlagsreglur og hugsanlega nálgun hérlendis. Nánari upplýsingar um morgunverðarfundinn er að finna hér ásamt glærum fyrirlesara
